Cofleidia dy iaith: Cynyddu defnydd o ieithoedd lleiafrifol a swyddogol
Cynhelir wythfed cynhadledd Cymdeithas Ryngwladol y Comisiynwyr Iaith yng Nghaerdydd ar 11 Mehefin eleni. Bydd y gynhadledd yn gyfle i archwilio effeithiau trawsnewidiol deddfu o blaid ieithoedd yng Nghymru a thu hwnt. Yn ogystal â sesiynau ymarferol yn rhannu profiadau sefydliadau o Gymru, bydd cyfraniadau gan y prif siaradwyr isod:
- Raymond Théberge, Comisiynydd Ieithoedd Swyddogol Canada
- Yr Athro Fernand de Varennes, Cyn-Rapporteur Arbennig y Cenhedloedd Unedig ar hawliau lleiafrifoedd
- Yr Athro Rob Dunbar, Cynrychiolydd y DU ar Bwyllgor Arbenigwyr Siarter Ieithoedd Rhanbarthol neu Leiafrifol Ewrop
Cefnogir y digwyddiad gan Lywodraeth Cymru.
Comisiynydd y Gymraeg, Efa Gruffudd Jones, yw cadeirydd Cymdeithas Ryngwladol y Comisiynwyr Iaith ar hyn o bryd. Cewch ragor o wybodaeth am y Gymdeithas ar ei gwefan.
Cynhaliwyd y gynhadledd yng Nghymru ddiwethaf yn 2017.
Lansiad Swyddogol y Gynhadledd
Cynhelir digwyddiad i lansio'r gynhadledd ar 10 Mehefin ym Mae Caerdydd. Bydd y lansiad yn gyfle i ddathlu dengmlwyddiant y Gymdeithas yng nghwmni:
- Efa Gruffudd Jones, Comisiynydd y Gymraeg a Chadeirydd Cymdeithas Ryngwladol y Comisiynwyr Iaith
- Delyth Jewell AS, Cadeirydd Pwyllgor Diwylliant, Cyfathrebu, y Gymraeg, Chwaraeon, a Chysylltiadau Rhyngwladol Senedd Cymru
- Yr Athro Fernand de Varennes, Cyn-Rapporteur Arbennig y Cenhedloedd Unedig ar hawliau lleiafrifoedd
Bydd y Prifardd Mererid Hopwood yn darllen cerdd gomisiwn arbennig i nodi’r achlysur a bydd adloniant hefyd gan y cerddor a’r cyfansoddwr Gwilym Bowen Rhys a chôr Ysgol Hamadryad.
Noder mai trwy wahoddiad yn unig y gellir mynychu'r lansiad.
Noddwyd y lansiad gan Delyth Jewell AS.
Diolch arbennig i Darwin Gray am eu nawdd hael.