Bydd ymgyrch 'Defnyddia dy Gymraeg' eleni yn digwydd rhwng 24 Tachwedd a 5 Rhagfyr 2025. Dyma ymgyrch flynyddol sy'n rhoi cyfle i sefydliadau o bob math ar draws Cymru hyrwyddo eu gwasanaethau Cymraeg. Mae’r ymgyrch hefyd yn annog siaradwyr Cymraeg i ddefnyddio’r iaith yn eu bywydau bob dydd.
Y llynedd, roeddem yn canolbwyntio ar weithio gyda sefydliadau yn y sector iechyd a gofal, gan ei fod yn hollbwysig fod pobl yn gallu cael mynediad at y gwasanaethau hyn yn Gymraeg, ond roedd croeso i unrhyw sefydliad i gymryd rhan. Rydym yn agored i gydweithio ag eraill ar gyfer ymgyrch 2025. Mae croeso i chi gysylltu os hoffech drafod unrhyw gyfleoedd i gydweithio.
Nod yr ymgyrch yw annog pawb i ddefnyddio’r Gymraeg sydd ganddynt, ac i fusnesau, elusennau a sefydliadau o bob math hyrwyddo gwasanaethau Cymraeg sydd ar gael i’r cyhoedd.
Dylid annog pobl o bob oed o bob cefndir ar draws Cymru i ddefnyddio eu Cymraeg bob dydd - gartref, yn y gwaith, yn y siop, wrth gymdeithasu, dros y ffôn, wyneb yn wyneb ac ar-lein.
Pen-blwydd Iaith Gwaith
Eleni rydym yn dathlu 20 mlynedd o gynllun Iaith Gwaith sef y bathodyn bach oren sy’n dangos bod modd defnyddio’r Gymraeg. Bydd ffocws penodol ar hyn yn rhan o'n hymgyrch eleni. Rydym yn awyddus i weld sut mae’r bathodyn yn cael ei ddefnyddio a’i arddangos yn eich lleoliad chi.
Bydd pecyn o adnoddau parod ar gael yn fuan.
Podlediad Defnyddia Dy Gymraeg
Yn y podlediad arbennig hwn i gyd-fynd ag ymgyrch Defnyddia dy Gymraeg, mae Hanna Hopwood yn cael cwmni Non, Rachel ac Emma o’r grŵp Eden ac yn sgwrsio am eu profiadau nhw gyda’r iaith Gymraeg yn eu bywydau personol, ac yn eu gyrfaoedd.
Eisiau cymryd rhan yn yr ymgyrch?
Rydym yn gweithio gyda sefydliadau ar draws Cymru i dynnu sylw at y gwasanaethau Cymraeg sydd ar gael i'r cyhoedd.
Os hoffech gymryd rhan yn yr ymgyrch yn y dyfodol, neu am ragor o wybodaeth, cysylltwch â ni.
Mae gwaith rheoleiddio sefydliadau cyhoeddus gan y Comisiynydd yn arwain at fwy o wasanaethau ar gael yn y Gymraeg, ac mae angen sicrhau bod siaradwyr y Gymraeg yn hyderus i fedru defnyddio’r iaith.
Mae’r cydweithio gyda busnesau ac elusennau drwy gynllun y Cynnig Cymraeg, hefyd yn cynyddu’r gwasanaethau Cymraeg sydd ar gael ganddyn nhw.
Mae cynyddu gwasanaethau Cymraeg a’u hyrwyddo yn allweddol i sicrhau bod pobl yn gallu defnyddio’r iaith yn eu bywydau bob dydd.
