Mae ymgyrch 'Defnyddia dy Gymraeg' yn annog pawb i ddefnyddio’r Gymraeg, boed hynny gartref, yn y gwaith, wrth siopa, wrth gymdeithasu, dros y ffôn neu ar-lein. Mae’r ymgyrch hefyd yn annog busnesau, elusennau a sefydliadau i dynnu sylw at y gwasanaethau Cymraeg sydd ar gael i’r cyhoedd.
Bydd ymgyrch eleni yn cael ei chynnal rhwng 16 Tachwedd a 7 Rhagfyr 2026.
Wedi gweld Defnyddia dy Gymraeg ar y cyfryngau cymdeithasol? Dyma le i ddarganfod mwy am ddefnyddio'r Gymraeg yn dy fywyd bob dydd, beth bynnag yw lefel dy Gymraeg.
Does dim rhaid i dy Gymraeg fod yn berffaith. Os wyt ti'n siarad Cymraeg yn rhugl, yn dysgu, yn deall ychydig neu eisiau dechrau defnyddio ambell air, beth am roi cynnig arni?
Defnyddia wasanaethau Cymraeg
Mae defnyddio gwasanaethau Cymraeg yn ffordd syml o wneud y Gymraeg yn rhan naturiol o fywyd bob dydd. Mae gwaith y Comisiynydd yn rheoleiddio sefydliadau cyhoeddus yn arwain at fwy o wasanaethau yn cael eu cynnig yn Gymraeg. Mae’r Comisiynydd hefyd yn gweithio gyda busnesau ac elusennau i gynyddu eu defnydd o’r Gymraeg a’u gwasanaethau Cymraeg. Pan fydd gwasanaeth Cymraeg ar gael, defnyddia fe.
Sut alla' i ddefnyddio mwy o Gymraeg?
Dechrau bob sgwrs yn Gymraeg
Edrych am arwyddion Iaith Gwaith
Wrth gysylltu â sefydliadau cyhoeddus
Wrth siopa neu ddefnyddio gwasanaethau busnes
Ar-lein ac ar gyfryngau cymdeithasol
Dros y ffôn neu wyneb yn wyneb
Yn y gwaith ac wrth gymdeithasu
Ydych chi’n sefydliad?
Mae Defnyddia dy Gymraeg hefyd yn gyfle i fusnesau, elusennau a sefydliadau dynnu sylw at y gwasanaethau Cymraeg maen nhw eisoes yn eu cynnig ac annog mwy o bobl i’w defnyddio.
Yn ystod yr ymgyrch, beth am:
hyrwyddo eich gwasanaethau Cymraeg i’ch cwsmeriaid neu ddefnyddwyr
esbonio’n glir sut a ble gall pobl ddefnyddio’r Gymraeg gyda chi
rhannu enghreifftiau o’r Gymraeg sydd ar waith yn eich sefydliad
defnyddio eich gwefan, newyddlenni a chyfryngau cymdeithasol i godi ymwybyddiaeth o’ch gwasanaethau Cymraeg
annog eich staff i ddefnyddio a hyrwyddo’r Gymraeg.
Gwnewch hi’n hawdd i bobl ddefnyddio’r Gymraeg
Nid yw cynnig gwasanaeth Cymraeg ar ei ben ei hun bob amser yn ddigon. Mae angen sicrhau bod pobl yn gwybod bod y gwasanaeth ar gael. Wrth hyrwyddo eich gwasanaethau, meddyliwch am y cwestiynau canlynol:
Beth sydd ar gael yn Gymraeg? Gwnewch hi’n glir pa wasanaethau y gall pobl eu defnyddio yn Gymraeg.
Ble mae’r gwasanaeth ar gael? Dywedwch wrth bobl os gallan nhw ddefnyddio’r Gymraeg ar-lein, dros y ffôn, wyneb yn wyneb neu drwy sianeli eraill.
Sut mae cael mynediad ato? Gwnewch y cam nesaf mor glir â phosibl. Os oes tudalen Gymraeg, rhif ffôn, ffurflen neu wasanaeth penodol ar gael, cyfeiriwch bobl ato.
Ydych chi’n dweud wrth bobl amdano? Defnyddiwch eich sianeli cyfathrebu i atgoffa pobl bod croeso iddyn nhw ddefnyddio’r Gymraeg gyda chi.
Eisiau cymryd rhan yn yr ymgyrch?
Rydym yn gweithio gyda sefydliadau ledled Cymru i dynnu sylw at y gwasanaethau Cymraeg sydd ar gael i’r cyhoedd, ac rydym yn agored i gyfleoedd i gydweithio.
Os hoffech gymryd rhan yn yr ymgyrch yn y dyfodol, neu am ragor o wybodaeth, cysylltwch â ni.
