Pwy sy’n gallu cyflwyno cwyn?
Gall unrhyw gyflwyno cwyn i’r Comisiynydd am sefydliad sy’n gweithredu cynllun iaith Gymraeg ynghylch:
- Diffyg cyfleoedd i ddefnyddio’r Gymraeg wrth dderbyn gwasanaethau
- Anawsterau wrth ddefnyddio’r Gymraeg yn y gwaith
- Anfodlonrwydd ynghylch sut mae sefydliad wedi ystyried y Gymraeg wrth wneud penderfyniadau
Os nad ydych mewn sefyllfa i wneud hynny, gall rhywun arall gyflwyno cwyn ar eich rhan. Bydd angen i chi roi eich caniatâd i hynny.
Sut mae cyflwyno cwyn?
Cyn y gallwch gyflwyno cwyn i'r Comisiynydd, mae’n rhaid i chi gyflwyno eich cwyn yn gyntaf i'r sefydliad rydych yn anhapus yn ei gylch, a rhoi cyfle rhesymol iddo ymateb a chynnig datrysiad.
Os na fyddwch yn derbyn ymateb, neu’n anfodlon gyda’r canlyniad neu’r broses a ddilynwyd, gallwch gyflwyno eich cwyn i'r Comisiynydd bryd hynny.
Mae’n rhaid i gŵyn gael ei chyflwyno yn ysgrifenedig. Gallwch wneud hynny drwy
- Ffurflen gwyno
- Anfon e-bost at post@cyg-wlc.cymru
- Cyfryngau cymdeithasol
- Post
Os nad ydych yn gallu cyflwyno cwyn yn ysgrifenedig oherwydd eich amgylchiadau, gallwch gysylltu â ni dros y ffôn, neu unrhyw gyfrwng addas arall i egluro hynny ac i drafod eich cwyn. Byddwn yn gwneud darpariaeth resymol gan roi cymorth i chi gyflwyno cwyn mewn ffordd arall.
Pa wybodaeth sydd angen i mi ei roi?
Gofynnwn i chi roi gymaint o wybodaeth â phosib i ni am beth sydd wedi digwydd, gan gynnwys
- Pa sefydliad ydych chi’n cwyno amdano
- Beth ydych chi’n cwyno amdano a disgrifiad o beth sydd wedi digwydd
- Dyddiadau ac amser perthnasol
- Ymateb y sefydliad i’ch cwyn (ble mae’n berthnasol)
- Tystiolaeth i gefnogi eich cwyn (e.e. lluniau, dogfennau, copïau o lythyrau, rhifau ffôn ayb)
Beth fydd yn digwydd ar ôl i mi gyflwyno cwyn?
O fewn 5 diwrnod gwaith byddwn yn:
- Cydnabod derbyn eich cwyn
- Rhoi gwybod i chi a yw eich cwyn yn ddilys neu beidio
- Os yw’n ddilys, mae’n bosib y byddwn yn gofyn i chi am wybodaeth bellach
- Cyflwyno eich cwyn i’r sefydliad yr ydych yn cwyno amdano, gan ofyn iddynt ymateb i’r gŵyn o fewn 10 diwrnod gwaith
Beth sy’n digwydd wedyn?
Ar ôl derbyn ymateb y sefydliad, byddwn yn penderfynu a oes angen i ni agor ymchwiliad i’ch cwyn.
Oes cyfleoedd eraill yn bodoli i roi sylwadau ar ymchwiliad?
Rydym yn hapus i dderbyn sylwadau gennych chi a’r sefydliad ar yr ymchwiliad tra bo’r ymchwiliad ar agor. Gallwch wneud hynny drwy gyflwyno eich sylwadau yn ysgrifenedig i post@cyg-wlc.cymru.
A fydd gwybodaeth am yr ymchwiliad yn cael ei gyhoeddi?
Rydym yn cyhoeddi pob adroddiad ar ymchwiliadau i gydymffurfiaeth â chynlluniau iaith Gymraeg ar ein gwefan.
Beth os nad ydw i’n gallu ymateb yn ysgrifenedig i wahanol gamau’r ymchwiliad?
Gallwn drafod pa gymorth neu addasiadau sy’n addas i chi. Er enghraifft, gallwn gynnig:
- Dulliau cyfathrebu gwahanol
- Cymorth ychwanegol
- Trefniadau penodol yn ôl eich anghenion
Gallwch gysylltu â ni dros y ffôn ar 0345 603 3221 neu drwy unrhyw un o’n sianeli cyfathrebu.