- Share icon
- Share on LinkedIn
- Share on Twitter
- Share on Facebook
Canolfan wyddoniaeth yng Ngogledd Cymru yw Xplore!. Mae eu canolfan yn cynnig gweithgareddau gwyddoniaeth, gweithgareddau fforio ac atyniadau hwyl. Mae Katie Williams, Swyddog Datblygu Busnes yn Xplore! yn trafod y broses o fynd am y Cynnig Cymraeg isod.
Pam fod defnyddio’r Gymraeg yn bwysig i chi?
Mae defnyddio'r Gymraeg yn bwysig i Xplore! gan ein bod yn cydnabod ei fod yn rhan gynyddol bwysig o ddiwylliant a hunaniaeth Wrecsam fel dinas newydd a chymuned hanesyddol Gymraeg. Mae’n bwysig ein bod yn cyfathrebu yn iaith ddewisol person a sicrhau ein bod yn cynrychioli pob rhan o’n cymuned leol.
Mae’n ofnadwy o bwysig i ni fel elusen addysgiadol fod ein buddiolwyr, gan gynnwys dysgwyr ifanc, yn gallu derbyn gwasanaeth yn Gymraeg a chlywed a phrofi terminoleg wyddonol yn ei chyd-destun. Bydd hyn yn helpu’r iaith i flodeuo a thyfu gan mai prin yw’r cyfleoedd i brofi gwyddoniaeth yn y Gymraeg y tu allan i addysg ffurfiol.
Pam ydych chi eisiau derbyn y Cynnig Cymraeg?
Bydd yn ein helpu i ddangos i’r gymuned leol ein hymrwymiad i ddarparu gwasanaeth i bobl Cymru. Bydd hefyd yn rhoi cydnabyddiaeth i’r staff am eu gwaith caled ac yn hwb i’w cymhelliant i barhau i ddatblygu eu sgiliau a hybu’r Gymraeg.
Ydych chi'n meddwl y bydd y Cynnig Cymraeg yn gwneud gwahaniaeth i'ch gwaith?
Gobeithiwn y bydd yn meithrin lefel newydd o falchder yn y sefydliad. Drwy weithio ar ein Cynnig Cymraeg, mae’r iaith yn dod yn rhan o’n diwylliant mewnol.
Oes gennych chi unrhyw gyngor i sefydliadau eraill sy’n ystyried gweithio tuag at y Cynnig Cymraeg?
Ein cyngor i eraill fyddai peidio ag oedi ac i ddechrau arni! Gall rhywun gyflawni cryn dipyn mewn amser cymharol fyr. Byddwn hefyd yn dweud bod hunan fyfyrio gonest yn allweddol - nid yn unig byddwch yn darganfod meysydd i'w datblygu ond hefyd yn tynnu sylw at yr hyn yr ydych eisoes yn ei wneud y gallwch fod yn falch ohono.
Pa dri pheth allwch chi eu cynnig i ddefnyddwyr gwasanaeth yn Gymraeg?
- Rydym yn cynnig ymweliadau ysgol i’n canolfan wyddoniaeth a darganfod yn Gymraeg gan gynnwys cyflwyno gweithdy neu sioe STEM yn Gymraeg.
- Gallwn gyflwyno cymorth i ysgolion a grwpiau cymunedol ar draws gogledd a chanolbarth Cymru gyfan drwy gyfrwng y Gymraeg.
- Rydym wedi creu amgylchedd sy'n hyrwyddo’r Gymraeg trwy ddefnyddio arwyddion dwyieithog, cyfarchion Cymraeg, a cyhoeddiadau a deunyddiau cyhoeddusrwydd.