Partneriaeth Awyr Agored

Mae'r Bartneriaeth Awyr Agored wedi'i sefydlu i fynd i'r afael â'r datgysylltiad yn y sector awyr agored yng ngogledd orllewin Cymru. Mae'n ceisio darparu cyfleoedd i bobl leol gymryd rhan mewn gweithgareddau awyr agored, gan gynnwys cerdded, beicio, dringo, canŵio, a phob math o chwaraeon antur.

Pa wasanaethau Cymraeg ydych chi’n cynnig?

Mae tri allan o bump o’n swyddogion datblygu yng Nghymru yn siarad Cymraeg, ac mae un arall yn dysgu’r iaith ar hyn o bryd. Mae’r aelodau hyn o’r tîm yn cynnal cyfarfodydd yn Gymraeg, yn ateb y ffôn ac e-byst yn Gymraeg, ac yn arwain gweithdai trwy gyfrwng y Gymraeg. Yn ogystal â hyn, mae dau aelod o’r tîm, sef Sioned a Bethan, yn rhedeg y rhaglen Bant a Ni, sy’n annog pobl i siarad Cymraeg drwy gymryd rhan mewn gweithgareddau awyr agored. Maent hefyd yn cefnogi darparwyr i ddefnyddio mwy o Gymraeg wrth hyfforddi.

Pam fod defnyddio’r Gymraeg yn bwysig i’r sefydliad a’r sector chwaraeon yn gyffredinol?

Un o’r prif resymau dros sefydlu’r Bartneriaeth yn y lle cyntaf oedd y diffyg cyfleoedd i bobl leol gymryd rhan mewn gweithgareddau trwy gyfrwng y Gymraeg. O ganlyniad, rydym yn gweithio gyda chyrff llywodraethu cenedlaethol, darparwyr, clybiau, ysgolion a chymunedau i greu mwy o gyfleoedd i bobl gymryd rhan mewn chwaraeon a gweithgareddau yn eu hiaith eu hunain. Gan ein bod yn cynnal gweithgareddau awyr agored ac yn defnyddio tirweddau naturiol megis afonydd, llynnoedd a mynyddoedd, mae’n bwysig iawn i ni fod pobl yn cysylltu â’r enwau gwreiddiol ac yn deall yr ystyr a’r hanes sydd y tu ôl iddynt. Yn ogystal, rydym yn gweithio’n aml gyda phobl fregus, felly mae’n hollbwysig ein bod yn gallu cynnig gweithgareddau yn eu hiaith gyntaf er mwyn sicrhau eu bod yn gyfforddus.

Disgrifiwch y broses o baratoi Cynllun Datblygu’r Gymraeg.

I baratoi Cynllun Datblygu’r Gymraeg, fe wnaethom sefydlu Grŵp Gweithio Cymraeg i arwain ar y gwaith. Aeth y grŵp ati i adolygu’r cynllun yn fanwl er mwyn nodi ein cryfderau a’n gwendidau, gan sicrhau bod gweddill tîm Cymru yn cytuno â’r canfyddiadau hyn. Yna cyfarfu’r grŵp gyda Guto o swyddfa Comisiynydd y Gymraeg i drafod pob agwedd o’r cynllun cyn derbyn cydnabyddiaeth ffurfiol. Ers hynny, rydym wedi parhau i gwrdd yn rheolaidd i sicrhau ein bod yn parhau i ddatblygu ac i gynnal y safonau rydym wedi’u gosod.
Pam ei fod yn bwysig eich bod wedi derbyn cymeradwyaeth y Cynnig Cymraeg? Beth yw’r budd i chi?
Mae gweithio drwy’r broses wedi bod yn hynod fuddiol i ni fel tîm gan ei fod wedi ein helpu i ddeall yn well ble mae ein cryfderau a pha feysydd sydd angen eu gwella. O ganlyniad, mae’r gwaith hwn wedi rhoi ffocws clir i’r Grŵp Cymraeg. Fel elusen sy’n ymfalchïo mewn dwyieithrwydd, mae derbyn cymeradwyaeth y Cynnig Cymraeg yn gam pwysig iawn i ni ac yn adlewyrchu ein hymrwymiad i’r iaith.

Enghraifft ddiweddar o ddefnydd da o’r Gymraeg

Yn ôl ym mis Mawrth, cynhaliwyd sesiwn Bant a Ni a oedd yn cynnwys taith o gwmpas Parc Craig y Nos, gyda phaned i orffen a digon o sgwrsio yn y Gymraeg. Ar ôl hynny, cymerwyd rhan mewn gweithdy diddorol ar enwau lleoedd hanesyddol Cymru. Mynychwyd y sesiwn gan bartneriaid o Brifysgol Cymru y Drindod Dewi Sant a Phrifysgol Caerdydd, gan adlewyrchu’r diddordeb eang yn y gwaith rydym yn ei wneud.

Fyddech chi’n annog eraill i geisio am y Cynnig Cymraeg, a pham?

Rydym yn credu’n gryf fod y Cynnig Cymraeg yn gyfle gwerthfawr i unrhyw sefydliad sy’n dymuno adolygu eu polisïau a’u systemau, gan sicrhau bod popeth yn gweithio’n effeithiol ac yn adlewyrchu ymrwymiad gwirioneddol i’r iaith.

Oes gennych chi unrhyw gyngor i sefydliadau eraill sy’n ystyried gweithio tuag at y Cynnig Cymraeg?

Ein cyngor ni fyddai sefydlu Grŵp Cymraeg i arwain ar y gwaith o ddatblygu’r Cynnig Cymraeg. Ar hyn o bryd mae ein grŵp yn cynnwys pedwar aelod o staff sy’n siarad Cymraeg, ond ein nod yn y dyfodol yw gwahodd staff sy’n dysgu’r iaith i ymuno hefyd. Rydym yn credu bod hyn yn gam pwysig iawn wrth greu darpariaeth gynhwysol a chynaliadwy. Mae cymorth ar gael pob cam o’r ffordd.