- Share icon
- Share on LinkedIn
- Share on Twitter
- Share on Facebook
Pwyllgor Diwylliant, Cyfathrebu, y Gymraeg, Chwaraeon, a Chysylltiadau Rhyngwladol yn derbyn tystiolaeth ar y Cynlluniau Strategol Cymraeg mewn Addysg (CSCA) a’r fframwaith deddfwriaethol sy’n cefnogi addysg cyfrwng Cymraeg
Mae’r CSCA yn rhan allweddol o’r strategaeth ar gyfer cyflawni amcanion a thargedau Cymraeg 2050 Llywodraeth Cymru. Ar sail y gwaith o ddarparu adborth ar ddrafftiau o CSCA pob awdurdod lleol, mae’r Comisiynydd o’r farn bod y fframwaith CSCA newydd yn llawer cryfach na’r hyn a oedd yn bodoli, a’i fod wedi arwain at gynlluniau mwy cadarn ac uchelgeisiol.
Er hyn, does dim amheuaeth bod angen cryfhau’r deddfwriaeth sy’n cefnogi’r CSCA a thwf addysg cyfrwng Cymraeg a dwyieithog. Er mwyn cyflawni amcanion a thargedau heriol Cymraeg 2050, mae angen mynd i’r afael â’r bylchau a’r gwendidau sylweddol sy’n bodoli yn y gyfundrefn gynllunio bresennol. Mae tystiolaeth y Comisiynydd yn awgrymu’r prif feysydd y dylai’r Bil Addysg Gymraeg arfaethedig ganolbwyntio arnynt. Mae’r materion mwyaf allweddol yn cynnwys:
- Gosod nod statudol clir ac uchelgeisiol a rhoi sail statudol i dargedau ac amcanion polisi addysg strategaeth Cymraeg 2050
- Mewn perthynas â’r CSCA a’r categorïau ieithyddol, cyflwyno fframwaith statudol a chyllidebol pwerus ar gyfer hwyluso symud ysgolion ar hyd continwwm ieithyddol
- Drwy ddatblygu un continwwm iaith Gymraeg, gosod mecanwaith deddfwriaethol ar gyfer codi safonau mewn ysgolion cyfrwng Saesneg dros gyfnod o amser fydd yn rhoi’r cyfle i bob disgybl fod yn siaradwyr Cymraeg hyderus.
- Cryfhau sail statudol cynllunio gweithlu addysg cyfrwng Cymraeg
- Sicrhau bod prosesau cyllido a chymeradwyo prosiectau cyfalaf addysg wedi’u halinio â gweledigaeth a thargedau Cymraeg 2050
- Cryfhau gofynion cyd-gynllunio strategol rhwng darpariaeth cyn-ysgol, y cyfnod statudol, a darpariaeth ôl-16
- Diwygio’r ddeddfwriaeth ynghylch trefniadau cludiant i’r ysgol
Gallwch ddarllen tystiolaeth lawn y Comisiynydd yma, neu gallwch wrando ar sesiwn lafar y Pwyllgor yma.